جديد وحصري
جديد وحصري
نقابة المحششين
سامح مبروك يكتب "نقابة المحششين" من سلسلة ترندات وتوباكو*.
- دا انقلاب كامل الأركان.
• هدي نفسك يا معالي النقيب.
- أهدى إزاي يا "شلوفه"؟ انت مش شايف اللي بيحصل؟ دول هيخربوا النقابة ويقلوا قيميتنا عشان السبوبة يا شلوفة.
• ما عاش ولا كان يا ريس "شبراوي".
- أهو عاش وكان واللي كان كان، عايزين يقلبوا نظام النقابة، يعني ايه كل عيل قضى مرة ولا مرتين من ديلر مشبوه ينضم لنقابة المحششين، شويه شويه هيدخلولنا بتوع الكولة والستروكس.
• متناسش يا ريس ان هما اللي مسرحين الديلرز دول وبيقبضوا منهم، وهما اللي بيوردولهم الحشيش كمان.
- ما أنا عارف يا شلوفة، ما هو عشان كده بقولك سبوبه، خلاص ماعدش فيه اخلاق للمهنة ولا احترام للمحششين المأصلين، شوية عيال منتفعين وقبيضة، وقال إيه مسميين نفسهم "حشيش بكرة أحلى" يا أخي أحلى.
• أحلى على أحلى يا ريس.
- ناقصة استظرافك يا شلوفة الزفت انت كمان.
• لا مؤاخذة يا ريس، بس ما قدرتش أمسك لساني الصراحة.
- إلهي ما تعرف تمسك نفسك تاني أبدا يا زفت، وكل محابسك تتفتح عالبحري، ومتلاقيش حد لا يمسحلك ولا ينشفك.
• خلاص يا ريس قولنا لا مؤاخذة، بس قولي انت بتفكر في إيه؟ الموجة عالية علينا قوي، وناس كتير بقت في صفهم عشان الفلوس اللي بيوزعوها.
- أنا براهن عالمحششين المحترمين أصحاب المبادئ، اللي انضموا للنقابة بعد ما داخوا لف من غرزة لغرزة ومن ديلر للتاني، اللي داقو كل أنواع الحشيش المضروب قبل ما يدوقوا حلاوة الحشيش الأفغاني والمغربي، بعد ما عرفوا كويس يقضوا منين؟ وأمتى؟ وازاي؟ اللي عرفوا ان التحشيش أدب وفن قبل ما يكون كيف.
• يعني هتعمل إيه يا ريس.
- إحنا نعمل استفتاء.
• يعني انتخابات جديدة يا ريس؟ إزاي بس يا ريس؟ مش ممكن يشتروا الأصوات.
- لا مش هنعمل انتخابات، هنعمل استفتاء سحب ثقة، يا أنا يا الخراب بتاع أحلى على أحلى دا، وانا واثق من الفوز.
• ان شاء الله يا ريس، واثيق من الفوز .. واثيق من الفوز، بصوت محيي الشرقاوي.
- غور من هنا ياد يا غلس، ملعون أبو شكلك عيل سمج، انت مصطبح صطفة سخافة على دماغك ولا إيه؟
وفي أجواء مهيبة، ووسط عملية ديموقراطية نزيهة، اجتمع كل المحششين المسجلين في النقابة من كل حدب وصوب، ليدلوا بأنفاسهم في هذا اليوم الفاصل، الذي قال عنه النقيب شبراوي اليوم الذي سيفصل بين الحق والباطل، الشرف والوضاعة، العطاء للنقابة أو الانتفاع منها.
في حين وصفها أصحاب حركة "حشيش بكرة أحلى"، أنه يوم البداية الجديدة، والعصر المزدهر، الذي سيمكن النقابة أخيرا من تنمية مواردها وينتفع منها أصحابها، يوم تُرد نقابة المحششين لأصحابها وتخطو قدمًا نحو مستقبل واعد.
وبين هذا وذاك أعدت غرز الاقتراع، حيث يلتف المصوتون حول الأراجيل بشفافية وحرية، الأراجيل "القص" تمثل دعم النقيب الحالي، وأراجيل "السلوم" تمثل تيار سحب الثقة من القيادة الحالية، وتسارعت النفخات وتعالى صوت الكركرة من كل حدب وصوب حتى اكتمل النصاب واستعد المحششين لاستقبال البائعين المشهورين ب (الديلرز) لإحصاء الأنفاس أو الأصوات وإعلان النتيجة.
ويبدو أن دخان الأراجيل لم يأتي بما يشتهي أنصار حركة "حشيش بكرة أحلى"، فقد كانت الغلبة على ما يبدو لأنصار الاستقرار ودعم النقيب الحالي المعلم شبراوي، وما إن فاحت رائحة الأخبار تلك حتى قرروا قلب الطاولة على الجميع.
فقد استعدوا بخطة ماكرة بديلة، فقد حشدوا أنصارهم من البائعين والمحششين الجدد غير المسجلين في النقابة والبلطجية خارج مقر النقابة استعدادًا للحظة كتلك، ولما حانت تلك اللحظة، استدعى أحد قادة الحركة من الداخل الجموع الغاضبة فاقتحمت مقر النقابة كالثيران الهائجة، تحطم وتحرق من تراه من أخضر أو يابس، فكسروا جميع الأراجيل واستباحوا أجساد وأعراض المحششين، وتعالت أصوات الصراخ والصياح والسباب بدلا من أصوات الكركرة، في خطة محكمة هدفها إفساد وتدنيس هذا المحفل الديموقراطي المقدس، وإبطال نتيجته الاقتراع، التي حتمًا كانت ستصب في غير مصلحتهم.
- يا شلوفة، الحقني يا شلوفة، مش عايزهم يوصلوا لغرزتي، لو وصلوا غرزتي مش هيسيبوني غير لما يشيلوني في وشي ويعلموا عليا.
• ما عاش ولا كان يا ريس شبرواي.
- هو أنا كل ما أقولك حاجه تقولي لا عاش ولا زفت، اتصرف يا حيوان هنموت.
• حاضر يا ريس أنا هجيب من الآخر وهطربقها على دماغهم ولاد كوم السجاير دول.
- اتصرف بسرعة يا شلوفة؟
• ماتقلقش يا ريس هتصرف.
وبعد لحظات عصيبة من العراك الذي كاد أن يرتقي لحرب الشوارع في مقر نقابة المحششين، تعالت صفارات غير معهودة من الشارع خارج المبنى الذي يحتوي مقر النقابة، لفتت انتباه الشبراوي الذي كان يحارب لإبقاء باب غرزته مغلقًا أمام جموع المعتدين، فصاح من جديد في "شلوفة" الذي كان حبيسًا هو الآخر في الغرزة المجاورة:
- أوعى يكون اللي أنا سامعه دا صح يا حيوان؟
• صح يا ريس.
- الله يخرب بيتك .. إيه اللي انت هببته دا يا غبي؟ انت وديتنا في داهيه.
• يا ريس أنا قفلتها كده في وشهم زي الدومنا، الأشكال دي لازم تتحبس.
- انت كده حبستنا كلنا .. الله يخرب بيتك
هنا راح الشبراوي يصرخ ويصيح:
- كبساااااااااه ..... كبساااااااااه ..... الله يخرب بيتك يا شلوفة الكلب.
* ترندات وتوباكو هي مقالات في هيئة قصص قصيرة مستوحاة من ترندات فضاء المنصات الاجتماعية ولا تمثل أي شخصيات أو أحداث حقيقية.
